रामेछापमा माओवादी झन आक्रमक

रामेछापमा माओवादी कार्यकर्ताले नेपाली कांग्रेस, एमाले र जनमोर्चाका सभाहरु बिथोलेका छन् ।
रामेछापमा माओवादी कार्यकर्ताहरुले फरक परक ठाउँमा भएका दलहरुका सभा बिथोलेका छन् । चैत ६ गते रामेछाप क्षेत्र नम्बर १ को धोवी बजारमा नेपाली कांग्रेसको आमसभामा माओवादी कार्यकर्ताले आक्रमण गरेका थिए । कार्यक्रममा त्यस क्षेत्रका कांग्रेस उमेदवार आङकावा शेर्पा पनि उपस्थित थिए । माओवादी आक्रमणलाई प्रहरीले हस्तक्षेप गरी असफल तुल्याएको छ । झडपमा कोही गम्भीर घाइते नभएको समाचार छ ।
आजै क्षेत्र नम्बर २ को दोरम्बामा एमाले सभामा माओवादी कार्यकर्ताले आक्रमण गरे । त्यस क्षेत्रका एमाले उमेदवार कैलाश ढुङ्गेल उपस्थित रहेको सभामा माओवादीले आक्रमण गरेपछि सभा बिथोलिएको थियो । त्यहाँको झडपमा पनि कोही गम्भीर घाइते नभएको श्रोतले बताएको छ ।
क्षेत्र नम्बर २ कै माकुदुममा भएको जनमोर्चाको सभालाई पनि माओवादी कार्यकर्ताले आज बिथोलेका छन् । माओवादी आक्रमणबाट जनमोर्चाका एक कार्यकर्ता घाइते भएका छन् ।