मुलुकमा पहिलोपटक मतदान मेसिन प्रयोग गरिने

९ मार्च, ०८ । मुलुकमा पहिलोपटक नमुनाका रूपमा विद्युतीय मतदान मेसिन प्रयोग गरिने भएको छ, जसनुसार निर्वाचन आयोगले सानो र सहरी बस्ती भएकाले काठमाडौं क्षेत्र नं. १ लाई चयन गरेको छ । आयोगका अनुसार प्रत्यक्ष र समानुपातिक दुवै सिटका लागि हुने मतदानका लागि यो मेसिन प्रयोग गरिने छ । विद्युतीय मतदान उपकरण भारतले सहयोगस्वरूप उपलब्ध गराएको हो । विद्युतीय मेसिनबाट मतदान गर्दा मतपेटिका र मतपत्र चाहिदैन । मतदाताले मेसिनको 'बटन' दबाएर आफूले चाहेको उम्मेदवार र पार्टीलाई मत दिन सक्छन् ।आयोगकाअनुसार 'मतदान मेसिन' मा एउटा 'नियन्त्रण युनिट' र अर्को 'मतदान युनिट' हुन्छ । मतदान युनिटमा पार्टी उम्मेदवारको चुनाव चिह्न राखिन्छ । चिह्न छेउको 'बटन' दबाएर मत हाल्नुपर्छ । बटन दबाएपछि त्यसको रेकर्ड 'नियन्त्रण युनिट' मा गएर बस्छ । नियन्त्रण युनिट मतदान अधिकृतको अधीनमा हुन्छ । मतदान युनिट गोप्य रूपमा भोट खसाल्ने ठाउमा राखिएको हुन्छ । मत खसाल्ने बेला मतदान अधिकृतले नियन्त्रण युनिटको बटन दबाउछन् । त्यसको संकेत मतदान युनिटको हरियो बत्तीले दिन्छ । हरियो बत्ती बलेपछि मतदाताले बटन दबाउनुपर्छ । मतदाताले बटन दबाउदा आउने आवाजका आधारमा मतदान अधिकृतले मत खसेको थाहा पाउंछन् । एकपटक बटन दबाएपछि पुनः अर्कोपटक त्यही मतदाताले बटन दबाउन नसक्ने व्यवस्था मिलाईएको हुन्छ ।