अनमिनको हेलिकोप्टर दुर्घटनाग्रस्त, ११ को ज्यान गयो

मार्च, ०८ । संयुक्त राष्ट्रसंघ (UNMIN) को हेलिकोप्टर आज अपरान्ह रामेछापको बेथान गाबिस वार्ड नं ९ मा दुर्घनाग्रस्त हुँदा हेलिकोप्टरमा सवार ११ जनाको ज्यान गएको छ । अहिलेसम्म १० जनाको शव क्षतविक्षत अवस्थामा फेला परेको छ । हेलिकोप्टरमा चालक दलका तीन सहित ११ जना सवार रहेको अनमिनले जनाएको छ । उद्वारमा संलग्न सुरक्षाकर्मीहरुकाअनुसार मृतकहरुमा हालसम्म पाईलट भीमबहादुर गुरुङको मात्र सनाखत भएको थाहा भएको छ भने अन्यको परिचय खुल्न सकेको छैन । परिचयपत्रका आधारमा पाईलटको सनाखत हुन सकेको बताईएको छ । स्थानिय प्रत्यक्षदर्शी राजु खड्काकाअनुसार साँझ ६:३० बजेसम्म हेलिकोप्टरमा आगो बलिरहेको थियो । दुर्घटना करिव अपरान्ह करिव ४ बजेतिर भएको थियो । हेलिकोप्टर सिन्धुली जिल्लाको दूधौली क्याम्पबाट काठमाडौं आईरहेको थियो । उद्वारको लागि सुरक्षाकर्मी खटाइएको बताइएको छ । दुर्घटनाको विस्तृत विवरण प्राप्त भईसकेको छैन ।