ग्रामीण महिला एकजुट भई रक्सीविरुद्ध

बझाङ, २२ फागुन । मेलबिसौना गाविस, तल्कोटकी महिलाले गाउँमा रक्सी व्यापार गर्दैआएका १४ व्यक्तिलाई १०० लिटर कच्ची रक्सी र पाँच पेटी पक्की रक्सीसहित नियन्त्रणमा लिई प्रहरी चौकीमा बुझाएका छन् । पुरुषले गाउँमा रक्सी खाएर सधैँ होहल्ला गरी महिलामाथि कुटपिट गर्ने घटनामा वृद्धि भएपछि ग्रामीण महिला एकजुट भई रक्सीविरुद्ध अभियान थालेका हुन् । प्रहरी चौकीले पक्राउ परेका सबै जनाबाट र दुईहजारका दरले जरिवाना लिई आगामी दिनमा रक्सीको व्यापार नगर्ने कागज गराएर छाडेको जिल्ला प्रहरी कार्यालयले जनाएको छ । उक्त कार्यालयका अनुसार सो घटनापछि त्यस इलाकामा रक्सीको व्यापार बन्द भएको छ । संविधानसभाको निर्वाचनको बेला रक्सी खाएर हुने होहल्ला हुन नदिन र संविधानसभाको निर्वाचनलाई शान्ति पुर्ण वातावरणमा सम्पन्न गर्न जिल्लाका महिला अहिले रक्सी बन्द गर्ने अभियानमा जुटेको बुझिएको छ ।गाउँघरमा महिलाले रक्सी बन्द गरे पनि सदरमुकाममा भने खुला रूपमा रक्सीको बिक्री वितरण भइरहेकोले पुर्ण नियन्त्रण गर्न समस्या परेको महिला अधिकार मञ्चकी अध्यक्ष सुशीला चन्दले बताउनुभयो ।